ಒಮ್ಮೆ ನಾನು, ಶಿಷ್ಯರು ಪವಿತ್ರಾತ್ಮನಿಂದ ತುಂಬಲ್ಪಡುವುದಕ್ಕಾಗಿ ಮೇಲಿನ ಕೋಣೆಯಲ್ಲಿ ಕಾಯುತ್ತಿರುವ ಒಂದು ವ್ಯಂಗ್ಯಚಿತ್ರವನ್ನು (cartoon) ನೋಡಿದ್ದೆನು (ಅ.ಕೃ. 1:12–14). ಈಗ ನಮಗೆ ತಿಳಿದಿರುವಂತೆ ಅವರು ಹತ್ತು ದಿನಗಳು ಕಾದರು. ಆದರೆ ಆ ಸಮಯದಲ್ಲಿ ಅವರಿಗೆ ಎಷ್ಟು ದಿನಗಳು ಕಾಯಬೇಕೆಂದು ತಿಳಿದಿರಲಿಲ್ಲ. ಅವರಲ್ಲಿ ಒಬ್ಬನು ಒಂಬತ್ತನೇ ದಿನ “ನನಗೆ ಕಾಯುವುದರಿಂದ ಬೇಸರವಾಗಿದೆ; ನಾನು ಮನೆಗೆ ಹೋಗುತ್ತೇನೆ” ಎಂದು ಹೇಳಿ ಹೊರಟನು. “ನೀವು ಇಚ್ಛಿಸಿದರೆ ಕಾಯಿರಿ” ಎಂದು ಉಳಿದವರಿಗೆ ಹೇಳಿದನು.

ಮುಂದಿನ ದಿನ ಮೇಲಿನ ಕೋಣೆಯಲ್ಲಿ ಉಳಿದಿದ್ದವರು ಪವಿತ್ರಾತ್ಮ ಮತ್ತು ಬೆಂಕಿಯಿಂದ ದೀಕ್ಷಾಸ್ನಾನ ಪಡೆದು ಮೇಲಿನಿಂದ ಶಕ್ತಿಯನ್ನು ಹೊಂದಿದ್ದಾರೆಂದು ಅವನು ಕೇಳಿದಾಗ ಅವನ ನಿರಾಶೆಯನ್ನು ಊಹಿಸಿ ನೋಡಿ! ತನ್ನ ಪ್ರಾರ್ಥನೆಯ ಉತ್ತರಕ್ಕೆ ಅವನು ಎಷ್ಟು ಹತ್ತಿರವಾಗಿದ್ದನು! ಅವನು ಇನ್ನೂ ಒಂದು ದಿನ ಕಾದಿದ್ದರೆ ಸಾಕಾಗಿತ್ತು.
ಯೇಸು ದಾಹಗೊಂಡವರನ್ನೇ ತನ್ನ ಬಳಿಗೆ ಬರಲು ಆಹ್ವಾನಿಸಿದನು (ಯೋಹಾ.7:37–39).

ಯಾರು ದೇವರನ್ನು ಸಂಪೂರ್ಣ ಹೃದಯದಿಂದ ಹುಡುಕುತ್ತಾರೋ ಅವರು ಆತನನ್ನು ಕಂಡುಕೊಳ್ಳುವರು (ಯೆರೆ. 29:13). ದೇವರನ್ನು ಶ್ರದ್ಧೆಯಿಂದ ಹುಡುಕುವವರಿಗೆ ದೇವರು ಪ್ರತಿಫಲ ನೀಡುತ್ತಾನೆ (ಇಬ್ರಿ. 11:6).

ಇದು ಹೀಗೆ ಯಾಕೆ? ನಾವು ದೇವರನ್ನು ಪೂರ್ಣ ಹೃದಯದಿಂದ ಹುಡುಕಿದಾಗ ಮಾತ್ರ, ಆತನೊಂದಿಗಿನ ನಮ್ಮ ಸಂಬಂಧವೇ ಈ ಲೋಕದಲ್ಲಿ ನಮಗೆ ಅತ್ಯಂತ ಪ್ರಮುಖವಾದುದು ಎಂದು ಸಾಬೀತುಪಡಿಸುತ್ತೇವೆ.

ಪವಿತ್ರಾತ್ಮನಿಂದ ತುಂಬಲ್ಪಡದೆ, ನಾವು ಕ್ರೈಸ್ತ ಜೀವಿತವನ್ನು ದೇವರು ಬಯಸುವ ರೀತಿಯಲ್ಲಿ ನಡೆಸುವುದು ಅಸಾಧ್ಯ. ಪವಿತ್ರಾತ್ಮನಿಂದ ತುಂಬಲ್ಪಡದೆ, ನಾವು ಕರ್ತನಿಗೆ ಯೋಗ್ಯವಾದ ರೀತಿಯಲ್ಲಿ ಸೇವೆ ಸಲ್ಲಿಸುವುದೂ ಅಸಾಧ್ಯ. ಯೇಸು ಸ್ವತಃ ತನ್ನ ಸೇವೆಯನ್ನು ಆರಂಭಿಸುವ ಮೊದಲು ಪವಿತ್ರಾತ್ಮನಿಂದ ಅಭಿಷೇಕಿಸಲ್ಪಟ್ಟನು (ಲೂಕ 3:21–23).

ಕರ್ತನು ತನ್ನ ಶಿಷ್ಯರಿಗೆ “ಮೇಲಿನಿಂದ ಬರುವ ಶಕ್ತಿಯಿಂದ ಹೊದಿಸುವ ತನಕ” ಕಾಯುವಂತೆ ಹೇಳಿದರು (ಲೂಕ 24:49). ಲೋಕವು ಸುವಾರ್ತೆಯನ್ನು ಕೇಳಬೇಕಾದ ಅಗತ್ಯದಲ್ಲಿದ್ದರೂ, ಅಪೊಸ್ತಲರು ಹೊರಗೆ ಹೋಗಿ ಸೇವೆ ಮಾಡುವ ಮೊದಲು ಪವಿತ್ರಾತ್ಮನಿಂದ ದೀಕ್ಷಾಸ್ನಾನ ಪಡೆಯುವವರೆಗೆ ಕಾಯಬೇಕಾಯಿತು (ಅ. ಕೃ.1:8).

ಹಾಗಾದರೆ ನಮ್ಮ ಬಗ್ಗೆ ಏನು?

ನಮಗೂ ಈ ಅಗತ್ಯವಿಲ್ಲವೆಂದು ಯೋಚಿಸುವುದು ಎಷ್ಟು ಮೂರ್ಖತನ!

ಪಂಚಾಶತ್ತಮ ದಿನ ಪೇತ್ರನು ಜನರಿಗೆ ಹೇಳಿದ್ದೇನೆಂದರೆ, ಪಶ್ಚಾತ್ತಾಪಪಟ್ಟು ದೀಕ್ಷಾಸ್ನಾನ ಪಡೆಯುವ ಎಲ್ಲರಿಗೂ ದೇವರು ಎರಡು ವರಗಳನ್ನು ನೀಡುತ್ತಾನೆ — ಪಾಪಗಳ ಕ್ಷಮೆ ಮತ್ತು ಪವಿತ್ರಾತ್ಮ (ಅ. ಕೃ. 2:38).
•

.
•

.

ನೀವು ಸತ್ತ ನಂತರ ಸ್ವರ್ಗಕ್ಕೆ ಹೋಗುವುದರಲ್ಲಿ ಮಾತ್ರ ಆಸಕ್ತಿ ಹೊಂದಿದ್ದರೆ, ನಿಮಗೆ ಪವಿತ್ರಾತ್ಮನ ದೀಕ್ಷಾಸ್ನಾನದ ಅಗತ್ಯವಿಲ್ಲ. ಪಾಪಗಳ ಕ್ಷಮೆ ಸಾಕು. ಆದರೆ ನೀವು ಭೂಮಿಯ ಮೇಲಿನ ನಿಮ್ಮ ದಿನಗಳನ್ನು ಉಪಯೋಗಕಾರಿಯಾಗಿ ಕಳೆಯಲು, ನಿಮಗಾಗಿ ಸತ್ತ ಕರ್ತನಾದ ಯೇಸುವಿಗೆ ಕೃತಜ್ಞತೆಯನ್ನು ತೋರಿಸುವ ಸಲುವಾಗಿ, ಆತನ ಸೇವೆ ಮಾಡುವುದರಲ್ಲಿ ಜೀವಿತವನ್ನು ಉಪಯೋಗಿಸಲು ಬಯಸುವುದಾದರೆ, ಆಗ ನೀವು ಪವಿತ್ರಾತ್ಮನಿಂದ ತುಂಬಲ್ಪಡಲೇಬೇಕು.

ಅನೇಕ ವಿಶ್ವಾಸಿಗಳು ಏಕೆ ಪವಿತ್ರಾತ್ಮನಲ್ಲಿ ದೀಕ್ಷಾಸ್ನಾನ ಪಡೆಯುವುದಿಲ್ಲ?

ಅನೇಕ ವಿಶ್ವಾಸಿಗಳು ಪವಿತ್ರಾತ್ಮನಲ್ಲಿ ದೀಕ್ಷಾಸ್ನಾನ ಪಡೆಯದಿರುವುದಕ್ಕೆ ಐದು ಪ್ರಮುಖ ಕಾರಣಗಳಿವೆ:

1. ಬೌದ್ಧಿಕ ತಪ್ಪು ನಂಬಿಕೆ
ಕೆಲವು ಧರ್ಮಶಾಸ್ತ್ರೀಯ ವಾದಗಳಿಂದ ಅವರು “ಹೊಸದಾಗಿ ಹುಟ್ಟಿದಾಗಲೇ ಪವಿತ್ರಾತ್ಮನಲ್ಲಿ ದೀಕ್ಷಾಸ್ನಾನ ಪಡೆದಿದ್ದೇವೆ” ಎಂದು ಬೌದ್ಧಿಕವಾಗಿ ನಂಬಿದ್ದಾರೆ. ಅವರು ಸೋತವರಾಗಿಯೂ, ಬಲಹೀನರಾಗಿಯೂ, ಫಲವಿಲ್ಲದವರಾಗಿಯೂ ಇದ್ದರೂ ಈ ವಂಚನೆಯನ್ನು ನಂಬುತ್ತಲೇ ಇರುತ್ತಾರೆ.

2. ತಾವು ಅರ್ಹರಲ್ಲವೆಂದು ಭಾವಿಸುವುದು
ತಾವು ಯೋಗ್ಯರಲ್ಲವೆಂದು ಭಾವಿಸುತ್ತಾರೆ. ಆದರೆ ವಾಸ್ತವವೆಂದರೆ, ನೀವು ನಿಮ್ಮನ್ನು ಎಷ್ಟು ಅನರ್ಹರೆಂದು ಭಾವಿಸುತ್ತೀರೋ, ಅಷ್ಟೇ ನೀವು ದೇವರ ವರಗಳನ್ನು ಸ್ವೀಕರಿಸಲು ಯೋಗ್ಯರಾಗುತ್ತೀರಿ. ದೇವರ ವರಗಳು ತಮ್ಮನ್ನು ಅತ್ಯಂತ ಅನರ್ಹರೆಂದು ಭಾವಿಸುವವರಿಗೆ ನೀಡಲ್ಪಡುತ್ತವೆ. ನೀವು ನಿಮ್ಮ ಪಾಪಗಳಿಗೆ ಪಶ್ಚಾತ್ತಾಪಪಟ್ಟಿದ್ದರೆ, ನೀವು ಎಷ್ಟು ಅನರ್ಹರಾಗಿದ್ದರೂ ಅದು ಮುಖ್ಯವಲ್ಲ. ಹಲ್ಲೆಲೂಯ!

3. ದೇವರು ಒಳ್ಳೆಯ ದೇವರೆಂದು ನಂಬದಿರುವುದು
ಕೆಲವರು ದೇವರು ಕೇಳುವ ಎಲ್ಲರಿಗೂ ತನ್ನ ವರಗಳನ್ನು ಉಚಿತವಾಗಿ ನೀಡುತ್ತಾನೆ ಎಂದು ನಂಬುವುದಿಲ್ಲ. ಅವರು ಉಪವಾಸ, ಪ್ರಾರ್ಥನೆ ಮುಂತಾದ ಕಾರ್ಯಗಳ ಮೂಲಕ ಬೆಲೆ ಕಟ್ಟಬೇಕು ಎಂದು ಭಾವಿಸುತ್ತಾರೆ. ಆದರೆ ದೇವರ ಎಲ್ಲಾ ವರಗಳೂ ಉಚಿತ. ಅವುಗಳನ್ನು ಖರೀದಿಸಲಾಗುವುದಿಲ್ಲ.

ಯೇಸು ನಂಬಿಕೆಯನ್ನು ನೀರು ಕುಡಿಯುವುದಕ್ಕೆ ಹೋಲಿಸಿದರು (ಯೋಹಾ. 7:37–38). ಪವಿತ್ರಾತ್ಮನನ್ನು ಸ್ವೀಕರಿಸುವುದು ನೀರು ಕುಡಿಯುವಷ್ಟು ಸರಳ. ಶಿಶುಗಳಿಗೂ ನೀರು ಕುಡಿಯುವುದು ಗೊತ್ತಿದೆ. ಹೊಸದಾಗಿ ಹುಟ್ಟಿದ ನಂಬಿಗಸ್ತರೂ ಪವಿತ್ರಾತ್ಮನಲ್ಲಿ ದೀಕ್ಷಾಸ್ನಾನ ಪಡೆಯಬಹುದು. ಅಪೊಸ್ತಲರ ಕೃತ್ಯಗಳಲ್ಲಿ ನಾವು ಓದುವಂತೆ ಪ್ರಾರಂಭದ ದಿನಗಳಲ್ಲಿ ಹೀಗೆಯೇ ಆಗುತ್ತಿತ್ತು.
4. ದಾಹವಿಲ್ಲದಿರುವುದು

ಅವರಿಗೆ ಆತ್ಮಿಕ ದಾಹವಿಲ್ಲ. ಯೇಸು ಒಂದು ಸಾಮ್ಯವನ್ನು ಹೇಳಿದರು. ಬೇಕಾದದ್ದನ್ನು ಪಡೆಯುವವರೆಗೆ ತನ್ನ ನೆರೆಯವನ ಬಾಗಿಲನ್ನು ತಟ್ಟುತ್ತಿದ್ದ ಒಬ್ಬ ಮನುಷ್ಯನ ಕುರಿತು. ನಂತರ ಯೇಸು ಹೇಳಿದ್ದೇನೆಂದರೆ, ಆತನಂತೆ ಕೇಳುವ, ಹುಡುಕುವ, ತಟ್ಟುವವರಿಗೆ ನಮ್ಮ ಸ್ವರ್ಗೀಯ ತಂದೆ ಪವಿತ್ರಾತ್ಮನನ್ನು ನೀಡುತ್ತಾನೆ (ಲೂಕ 11:9–13).

5. ಒಂದು ರೀತಿಯ ಅನುಭವಕ್ಕಾಗಿ ಕಾಯುವುದು
ಕೆಲವರು ಅನ್ಯಭಾಷೆ ಅಥವಾ ಭಾವನಾತ್ಮಕ ಅನುಭವಕ್ಕಾಗಿ ಕಾಯುತ್ತಾರೆ. ಇತರರ ಸಾಕ್ಷಿಯಂತೆ ಅನುಭವ ಬೇಕೆಂದು ಬಯಸುತ್ತಾರೆ. ಆದರೆ ಪವಿತ್ರಾತ್ಮನು ಸರಳ ನಂಬಿಕೆಯ ಮೂಲಕ ಸ್ವೀಕರಿಸಲ್ಪಡುತ್ತಾನೆ (ಗಲಾತ್ಯ. 3:2; ಲೂಕ 11:9–13).

ಭಾವನೆಗಳಿಗಾಗಿ ಕಾಯಬೇಡಿ. ದೇವರು ನಿಮಗೆ ಭರವಸೆ ನೀಡಲಿ ಎಂದು ಕೇಳಿರಿ. ನಿಮ್ಮ ಪಾಪಗಳು ಕ್ಷಮಿಸಲ್ಪಟ್ಟಿವೆ ಮತ್ತು ನೀವು ಆತನ ಮಗುವಾಗಿದ್ದೀರಿ ಎಂಬ ಭರವಸೆ ಆತನು ನೀಡಿದಂತೆಯೇ, ಆತನು ನಿಮಗೆ ಪವಿತ್ರಾತ್ಮನಿಂದ ತುಂಬಿಸಿದ್ದಾನೆ ಎಂಬ ಭರವಸೆಯನ್ನೂ ನೀಡಬಲ್ಲನು.

ನಿಮಗೆ ಬೇಕಾಗಿರುವುದು ಅನುಭವವಲ್ಲ — ಬಲ (ಅ. ಕೃ.1:8).

ಆದ್ದರಿಂದ ದಾಹಗೊಳ್ಳಿರಿ — ನಂಬಿರಿ — ಸ್ವೀಕರಿಸಿರಿ.
ಇದಲ್ಲದೆ, ಈಗಲೇ ಅನುಗ್ರಹದ ಕಾಲ. ಇಂದು ರಕ್ಷಣೆಯ ದಿನ.
“ಕರ್ತನ ಆತ್ಮವು ನಿನ್ನ ಮೇಲೆ ಬಂದು ನೀನು ಮತ್ತೊಬ್ಬ ಮನುಷ್ಯನಾಗಿ ಮಾರ್ಪಡುವೆ”(1 ಸಮು. 10:6).