ಒಬ್ಬ ವಿಶ್ವಾಸಿಯು ಹೊಸದಾಗಿ ಯಾವುದಾದರೂ ಸತ್ಯವನ್ನು ಗ್ರಹಿಸಿದಾಗ, ಅದನ್ನು ಅದೊಂದೇ ಸತ್ಯವೆಂಬಂತೆ ಅತಿ ಗಂಭೀರವಾಗಿ ಹಿಡಿದುಕೊಳ್ಳುವುದು ತುಂಬಾ ಸುಲಭ. ಹೀಗೆ ಮಾಡಿದಾಗ ಆ ಸತ್ಯವನ್ನು ಸಮತೋಲನಗೊಳಿಸುವಂತ ಇತರ ಸತ್ಯಗಳನ್ನೆಲ್ಲಾ ಕಡೆಗಣಿಸುವ ಅಪಾಯವಿದೆ. ಯಥಾರ್ಥ ಕ್ರೈಸ್ತ ನಂಬಿಕೆಯ ವಿಷಯದಲ್ಲಿ ಇದು ವಿಶೇಷವಾಗಿ ನಡೆಯುವ ಸಂಗತಿ.

ಹಳೆಯ ಒಡಂಬಡಿಕೆಯಲ್ಲಿ ನಂಬಿಕೆಗೆ ಮಹತ್ವ ಇರಲಿಲ್ಲ. ಕೇವಲ ಕಾರ್ಯಗಳು ಅಥವಾ ಕ್ರಿಯೆಗಳು ಮುಖ್ಯವಾಗಿದ್ದವು. ಮೋಶೆಯ ಧರ್ಮಶಾಸ್ತ್ರವು ದೇವರನ್ನು ನಂಬುವುದರ ಬಗ್ಗೆ ಏನನ್ನೂ ಹೇಳಲಿಲ್ಲ. ಆದರೆ ಅದು 613 ಆಜ್ಞೆಗಳನ್ನು ನೀಡಿತು - ದೇವರನ್ನು ಮೆಚ್ಚಿಸಲು ಮನುಷ್ಯನು ಪಾಲಿಸಬೇಕಾದ ಕಾರ್ಯಗಳ ದೊಡ್ಡ ಪಟ್ಟಿ.

ಆದರೆ ನಾವು ಹೊಸ ಒಡಂಬಡಿಕೆಗೆ ಬರುವಾಗ, "ನಂಬಿಕೆಯ ಮೂಲಕ ಕೃಪೆಯಿಂದಲೇ ನೀವು ರಕ್ಷಣೆ ಹೊಂದಿದ್ದೀರಿ. ಈ ರಕ್ಷಣೆಯು ನಿಮ್ಮಿಂದ ಉಂಟಾದದ್ದಲ್ಲ, ಇದು ದೇವರ ವರವೇ. ಅದು ಪುಣ್ಯಕ್ರಿಯೆಗಳಿಂದ ಉಂಟಾದದ್ದಲ್ಲ; ಆದ್ದರಿಂದ ಹೊಗಳಿಕೊಳ್ಳುವದಕ್ಕೆ ಯಾರಿಗೂ ಆಸ್ಪದವಿಲ್ಲ,”ಎಂದು ಓದುತ್ತೇವೆ (ಎಫೆ. 2:8,9). ಅನೇಕ ವಿಶ್ವಾಸಿಗಳು ಇದೊಂದೇ ವಚನವನ್ನು ಪ್ರತ್ಯೇಕವಾಗಿ ಓದಿಕೊಂಡು, ವಿಪರೀತವಾಗಿ ಆಲೋಚಿಸಿ, ಕಾರ್ಯಗಳು ಮುಖ್ಯವಲ್ಲ ಎಂದು ಹೇಳುತ್ತಾರೆ - ಏಕೆಂದರೆ (ಈ ವಚನವು ಹೇಳುವಂತೆ) ಸತ್ಕಾರ್ಯಗಳಿಂದಾಗಿ ಒಬ್ಬ ವ್ಯಕ್ತಿ ತನ್ನ ಕಾರ್ಯಗಳ ಬಗ್ಗೆ ಹೆಮ್ಮೆಪಡಬಹುದು.

ಆದರೆ ಹೊಸ ಒಡಂಬಡಿಕೆಯು ನಿಜವಾಗಿ ಏನನ್ನು ಕಲಿಸುತ್ತದೆ? ನೀವು ಸತ್ಯವೇದದ ಒಂದೇ ವಚನದಿಂದ ಸಂಪೂರ್ಣ ಸತ್ಯವನ್ನು ಕಂಡುಕೊಳ್ಳಲು ಸಾಧ್ಯವಿಲ್ಲ. ಸೈತಾನನು ಅರಣ್ಯದಲ್ಲಿ ಯೇಸುವಿಗೆ "ಇದು ಬರೆಯಲ್ಪಟ್ಟಿದೆ" (ಮತ್ತಾ. 4:6), ಎಂದು ಒಂದು ವಚನವನ್ನು ಉಲ್ಲೇಖಿಸಿದಾಗ, ಯೇಸುವು "ಇನ್ನೊಂದೆಡೆ ಇದು ಸಹ ಬರೆಯಲ್ಪಟ್ಟಿದೆ" ಎಂದು ಹೇಳಿದರು. ಆದ್ದರಿಂದ ನಾವು ಪೂರ್ಣ ಸತ್ಯವನ್ನು ನಿಖರವಾಗಿ ಅರ್ಥ ಮಾಡಿಕೊಳ್ಳ ಬೇಕಾದರೆ, ಅನೇಕ ವೇಳೆ ಸತ್ಯವೇದದ ಒಂದು ವಚನವನ್ನು ಸತ್ಯವೇದದ ಬೇರೊಂದು ವಚನದೊಂದಿಗೆ (ಅಥವಾ ವಚನಗಳೊಂದಿಗೆ) ಸಮತೋಲನ ಗೊಳಿಸಬೇಕು, ಎಂದು ನಾವು ನೋಡುತ್ತೇವೆ. ಸೈತಾನನು ಸತ್ಯವೇದದ ಒಂದು ವಚನದಿಂದ ಕರ್ತನಾದ ಯೇಸುವನ್ನು ಸಹ ಮೋಸಗೊಳಿಸಲು ಪ್ರಯತ್ನಿಸಿದರೆ, ಇಂದು ಅವನು ಸತ್ಯವೇದದ ಯಾವುದಾದರೂ ಒಂದು ವಚನವನ್ನು ಪ್ರತ್ಯೇಕವಾಗಿ ತೆಗೆದುಕೊಂಡು ವಿಶ್ವಾಸಿಗಳನ್ನು ಮೋಸಗೊಳಿಸಲು ಇನ್ನೂ ಹೆಚ್ಚಾಗಿ ಪ್ರಯತ್ನಿಸುತ್ತಾನೆ. ಆದ್ದರಿಂದ ನಾವು ಮೋಸ ಹೋಗುವುದನ್ನು ತಪ್ಪಿಸಬೇಕಾದರೆ, ಸತ್ಯವೇದವನ್ನು ಅಧ್ಯಯನ ಮಾಡುವಲ್ಲಿ ನಾವು ಅತ್ಯಂತ ಜಾಗರೂಕರಾಗಿರಬೇಕು. ಪಕ್ಷಿಗಳ ಎರಡು ರೆಕ್ಕೆಗಳಂತೆ ಸತ್ಯಕ್ಕೂ ಎರಡು ರೆಕ್ಕೆಗಳಿವೆ ಮತ್ತು ನೀವು ನೇರವಾಗಿ ಹಾರಾಟ ಮಾಡಲು ಎರಡು ರೆಕ್ಕೆಗಳನ್ನು ಬಳಸಿಕೊಳ್ಳಬೇಕು. ಒಂದೇ ರೆಕ್ಕೆಯನ್ನು ಉಪಯೋಗಿಸಿಕೊಂಡರೆ, ನೀವು ಸಂಪೂರ್ಣವಾಗಿ ತಪ್ಪು ದಾರಿಯಲ್ಲಿ ಸಾಗುತ್ತೀರಿ, ಅಥವಾ ಇದ್ದಲ್ಲೇ ಸುತ್ತುತ್ತಾ ಯಾವುದೇ ಪ್ರಗತಿಯನ್ನು ಸಾಧಿಸುವುದಿಲ್ಲ!

ನಾವು ’ಎಫೆಸದವರಿಗೆ 2'ನೇ ಅಧ್ಯಾಯದಲ್ಲಿಈ ಸಮತೋಲನವನ್ನು ನೋಡುತ್ತೇವೆ. ಅಲ್ಲಿ ಒಂದು ಹೇಳಿಕೆ ಹೀಗೆ ಹೇಳುತ್ತದೆ, "ನಂಬಿಕೆಯ ಮೂಲಕ ಕೃಪೆಯಿಂದಲೇ ರಕ್ಷಣೆ ಹೊಂದಿದವರಾಗಿದ್ದೀರಿ. ಆ ರಕ್ಷಣೆಯು ನಿಮ್ಮಿಂದ ಉಂಟಾದುದ್ದಲ್ಲ, ಅದು ದೇವರ ವರವೇ. ಅದು ಪುಣ್ಯಕ್ರಿಯೆಗಳಿಂದ ಉಂಟಾದುದ್ದಲ್ಲ; ಆದುದರಿಂದ ಹೊಗಳಿಕೊಳ್ಳುವುದಕ್ಕೆ ಯಾರಿಗೂ ಆಸ್ಪದವಿಲ್ಲ."ಆದರೆ ಯಾರೊಬ್ಬರೂ ದಾರಿ ತಪ್ಪಿ ಹೋಗಬಾರದೆಂದು (ಒಂದೇ ರೆಕ್ಕೆಯಿಂದ ಹಾರಾಡುವುದು) ಮುಂದಿನ ವಚನದಲ್ಲಿ ತಕ್ಷಣವೇ ಹೀಗೆ ಹೇಳುತ್ತದೆ, "ನಾವು ಆತನ ನಿರ್ಮಾಣ; ಸತ್ಕಾರ್ಯಗಳನ್ನು ಮಾಡುವುದಕ್ಕಾಗಿಯೇ ಕ್ರಿಸ್ತ ಯೇಸುವಿನಲ್ಲಿ ಸೃಷ್ಟಿಸಲ್ಪಟ್ಟೆವು. ನಾವು ಸತ್ಕಾರ್ಯಗಳನ್ನು ನಡೆಸುವವರಾಗಿ ಬದುಕಬೇಕೆಂದು ದೇವರು ನಮ್ಮನ್ನು ಮೊದಲೇ ನೇಮಿಸಿದನು."(ಎಫೆ. 2:8-10). ಆದ್ದರಿಂದ, ನಮ್ಮ ರಕ್ಷಣೆಯು - ಒಳ್ಳೆಯ ಕಾರ್ಯಗಳಿಂದ ಉಂಟಾಗುವುದಿಲ್ಲ - ಆದರೆ ದೇವರು ಸಿದ್ಧಪಡಿಸಿರುವ ಒಳ್ಳೆಯ ಕಾರ್ಯಗಳನ್ನು ರಕ್ಷಿಸಲ್ಪಟ್ಟ ನಾವು ಪೂರೈಸಬೇಕೆಂಬ ಉದ್ದೇಶವು ಮೊದಲೇ ನಿಶ್ಚಯಿಸಲ್ಪಟ್ಟಿದೆ.

ನಾವು ಇದೇ ರೀತಿಯ ಸಮತೋಲನವನ್ನು ’ಫಿಲಿಪ್ಪಿಯವರಿಗೆ 2:12,13'ರಲ್ಲಿ ಕಾಣುತ್ತೇವೆ, "ಮನೋಭೀತಿಯಿಂದ ನಡುಗುವವರಾಗಿ ನಿಮ್ಮ ನಿಮ್ಮ ರಕ್ಷಣೆಯನ್ನು ಸಾಧಿಸಿಕೊಳ್ಳಿರಿ." ನಂತರ ಅದೇ ವಾಕ್ಯವು ಮುಂದುವರೆದು, "ದೇವರೇ ತನ್ನ ಸುಚಿತ್ತವನ್ನು ನೆರವೇರಿಸಬೇಕೆಂದು ನಿಮ್ಮಲ್ಲಿ ಉದ್ದೇಶವನ್ನೂ, ಪ್ರಯತ್ನವನ್ನೂ ಉಂಟುಮಾಡುವವನಾಗಿದ್ದಾನೆ," ಎಂದು ಹೇಳುತ್ತದೆ. ಮೊದಲು ದೇವರು ನಮ್ಮೊಳಗೆ ಕಾರ್ಯ ಮಾಡುತ್ತಾರೆ, ನಾವು ಅದನ್ನು ನಮ್ಮ ಹೊರಗಿನ ಜೀವಿತದಲ್ಲಿ ಮುಂದುವರಿಸಿ ಪೂರೈಸಬೇಕು.

’ಯಾಕೋಬನು 2:17,18'ರಲ್ಲಿ, "ಕ್ರಿಯೆಗಳಿಲ್ಲದಿದ್ದರೆ ನಂಬಿಕೆಯು ತನ್ನಲ್ಲಿ ಜೀವವಿಲ್ಲದ್ದು," ಎಂದು ಹೇಳಲಾಗಿದೆ. ಯಾಕೋಬನು ಹಾಗೆಯೇ ಮುಂದುವರೆದು, "ಹೀಗಲ್ಲವಾದರೆ ಒಬ್ಬ ಮನುಷ್ಯನು - ನಿನಗೆ ನಂಬಿಕೆಯುಂಟು, ನನಗೆ ಕ್ರಿಯೆಗಳುಂಟು,"ಎಂದು ಹೇಳಬಹುದು ಎನ್ನುತ್ತಾನೆ. ಆದರೆ ಯಾಕೋಬನು (ಪವಿತ್ರಾತ್ಮನಿಂದ ಪ್ರೇರಿತನಾಗಿ), "ಕ್ರಿಯೆಗಳ ಮುಖಾಂತರ ನನ್ನ ನಂಬಿಕೆಯನ್ನು ನಿನಗೆ ತೋರಿಸುತ್ತೇನೆ; ನೀನು ಕ್ರಿಯೆಗಳಿಲ್ಲದೆ ನಿನ್ನ ನಂಬಿಕೆಯನ್ನು ನನಗೆ ತೋರಿಸು ನೋಡೋಣ,"ಎಂದು ಹೇಳುತ್ತಾನೆ. ಆದ್ದರಿಂದ "ನಂಬಿಕೆಯ ಕ್ರಿಯೆಗಳನ್ನು" ಹುಟ್ಟಿಸದ ನಂಬಿಕೆಯು ಸತ್ತದ್ದಾಗಿದೆ. ಇದುವೇ ಸತ್ತ ನಂಬಿಕೆ ಮತ್ತು ಜೀವಂತ ನಂಬಿಕೆಯ ನಡುವಿನ ವ್ಯತ್ಯಾಸವಾಗಿದೆ.

ನಿಜವಾದ ಕ್ರೈಸ್ತ ನಂಬಿಕೆಯ ಮೂಲಕ ಯಾವಾಗಲೂ ನಂಬಿಕೆಯ ಕ್ರಿಯೆಗಳು ಫಲಿಸುತ್ತವೆ - ಅಂದರೆ, ಪವಿತ್ರಾತ್ಮನ ಮೇಲೆ ಅವಲಂಬಿತವಾಗಿ ಮಾಡುವಂತ ಕೆಲಸಗಳು. ಏಕೆಂದರೆ ಅದೇ ನಿಜವಾದ ನಂಬಿಕೆಯಾಗಿದೆ: ಪವಿತ್ರಾತ್ಮನ ಮೇಲೆ ಅವಲಂಬನೆ ಹೇಗಿರುತ್ತದೆ ಎಂದರೆ, ಕೊಂಬೆಯು ಫಲವನ್ನು ನೀಡಲು ಮರದ ಮೇಲೆ ಅವಲಂಬಿತವಾಗಿರುವ ಹಾಗೆ. ಆದ್ದರಿಂದ, ಹೊಸ ಒಡಂಬಡಿಕೆಯಲ್ಲಿ ಕಂಡುಬರುವ ಸತ್ಯದ ಸಮತೋಲನ ನಿಜವಾಗಿ ನಮ್ಮಲ್ಲಿದ್ದರೆ, ಅದು ನಮ್ಮ ಜೀವಿತದಲ್ಲಿ - ನಮ್ಮ ಕುಟುಂಬ ಸಂಬಂಧಗಳಲ್ಲಿ ಮತ್ತು ನಮ್ಮ ಕೆಲಸದ ಸ್ಥಳಗಳಲ್ಲಿ - ಪವಿತ್ರಾತ್ಮನ ಶಕ್ತಿಯ ಮೂಲಕ, ನಂಬಿಕೆಯಿಂದ (ಅಂದರೆ, ಪವಿತ್ರಾತ್ಮನ ಮೇಲಣ ನಮ್ಮ ಅವಲಂಬನೆಯಿಂದ) ಕ್ರಿಸ್ತನ ಸಾರೂಪ್ಯ ಉತ್ಪತ್ತಿಯಾಗುವುದರ ಮೂಲಕ ಕಂಡುಬರುತ್ತದೆ.

"ನಿಜವಾದ ಕ್ರೈಸ್ತ ನಂಬಿಕೆಯ ಮೂಲಕ ಯಾವಾಗಲೂ ನಂಬಿಕೆಯ ಕ್ರಿಯೆಗಳು ಫಲಿಸುತ್ತವೆ - ಅಂದರೆ, ಪವಿತ್ರಾತ್ಮನನ್ನು ಅವಲಂಬಿಸಿ ಮಾಡಲ್ಪಡುವ ಕಾರ್ಯಗಳು”

ಕ್ರಿಯೆಗಳಿಲ್ಲದ ನಂಬಿಕೆಯು ಸತ್ತಂತಹ, ಕೇವಲ ಮನಸ್ಸಿನ ನಂಬಿಕೆಯಾಗಿದೆ - ಮತ್ತು ಇದು ಪವಿತ್ರಾತ್ಮನು ಒಬ್ಬ ವ್ಯಕ್ತಿಯ ಹೃದಯದಲ್ಲಿ ಉಂಟುಮಾಡುವ ನಿಜವಾದ ನಂಬಿಕೆ ಅಲ್ಲವಾಗಿದೆ. ನಿಜವಾದ ಕ್ರೈಸ್ತ ನಂಬಿಕೆಯು ಸಂಪೂರ್ಣವಾಗಿ ದೇವರ ಮೇಲೆ ಆತುಕೊಳ್ಳುವಂತದ್ದಾಗಿದ್ದು, ಅದು ಯಾವಾಗಲೂ ಒಬ್ಬ ವ್ಯಕ್ತಿಯ ಜೀವಿತದಲ್ಲಿ ಹೆಚ್ಚು ಹೆಚ್ಚಾಗಿ ಕ್ರಿಸ್ತನ ಸಾರೂಪ್ಯವೆಂಬ ಫಲವನ್ನು ಉಂಟುಮಾಡುತ್ತದೆ. ಮತ್ತೊಂದೆಡೆ, ನಂಬಿಕೆಯಿಲ್ಲದ ಕ್ರಿಯೆಗಳು ಯಾವುವೆಂದರೆ, ಮನುಷ್ಯನು ತನ್ನ ಸ್ವಂತ ಮಾನವ ಶ್ರಮದಿಂದ ದೇವರನ್ನು ಮೆಚ್ಚಿಸಲು ಪ್ರಯತ್ನಿಸುವಂತ ಕ್ರಿಯೆಗಳಾಗಿದ್ದು ಅದು ಸ್ವ-ನೀತಿಯನ್ನು ಉಂಟುಮಾಡುವಂಥದ್ದಾಗಿದೆ. ದೇವರ ವಾಕ್ಯದಲ್ಲಿ ಇದನ್ನು ’ಹೊಲೆಯ ಬಟ್ಟೆ’ಯೆಂದು ಕರೆಯಲಾಗಿದೆ - ("ನಮ್ಮ ಎಲ್ಲಾ ನೀತಿಯ ಕಾರ್ಯಗಳು ಹೊಲೆಯ ಬಟ್ಟೆಯಂತಿವೆ" - ಯೆಶಾ. 64:6).

ನಾನು ಈ ಪತ್ರಿಕೆಯಲ್ಲಿ ಹಂಚಿಕೊಂಡಿರುವ ವಿಷಯವು ಒಂದು ಬಹು ಪ್ರಾಮುಖ್ಯವಾದ ಸತ್ಯವಾಗಿದೆ - ಯಾಕೆಂದರೆ ನಮ್ಮ ನಿತ್ಯತ್ವದ ಜೀವಿತವು ಇದನ್ನು ಅವಲಂಬಿಸಿದೆ - ಆದ್ದರಿಂದ ನಾವು ಈ ವಿಷಯದಲ್ಲಿ ತಪ್ಪು ತಿಳುವಳಿಕೆ ಹೊಂದಿರುವುದು ಅಪಾಯಕಾರಿಯಾಗಿದೆ. ಆದಕಾರಣ ಸೈತಾನನು ನಿಮ್ಮನ್ನು ನಕಲಿ "ನಂಬಿಕೆ"ಗೆ ನಡೆಸಿ ವಂಚಿಸದಂತೆ ನೋಡಿಕೊಳ್ಳಿರಿ - ಅದು ಯಾವುದೆಂದರೆ, ಕೇವಲ ಮನಸ್ಸಿನ ನಂಬಿಕೆಯಾಗಿದ್ದು, ಅದು ನಮ್ಮಲ್ಲಿ ಕ್ರಿಸ್ತನ ಜೀವಿತವನ್ನು ಉಂಟುಮಾಡಲಾರದ ನಂಬಿಕೆಯಾಗಿರುತ್ತದೆ.

ಕಿವಿಯುಳ್ಳವನು ಕೇಳಿಸಿಕೊಳ್ಳಲಿ. ಆಮೆನ್